O presidente do comité de empresa, José Ángel Sánchez, confirmou que as mobilizacións seguirán adiante. Segundo detallou, a empresa debe catro nóminas e media paga extra, xa que a última vez que cobraron foi en decembro de 2025 e xaneiro de 2026, quedando pendentes os meses de febreiro, marzo, a paga extra de marzo, abril e maio.
O pasado 30 de abril, o grupo obtivo unha prórroga tras finalizar o prazo do preconcurso de acredores para presentar un plan de viabilidade. Os plans foron presentados ante o xulgado mercantil número 2 da Coruña e están á espera de aprobación, existindo un período de impugnacións por parte dos acredores. A proposta da empresa consiste en reactivar progresivamente algunhas seccións das plantas, pero sen poñer ao día os salarios, unha situación que o sindicalista considera inviable.
Sánchez lamentou que as propostas da compañía se centran máis en salvagardar o seu patrimonio que en garantir a produtividade industrial nas factorías da comarca betanceira.
“"Os plans da empresa son poñer en marcha progresivamente algunhas das seccións das plantas pero sen poñer ao día as nóminas, algo que é inviable"
Ante esta situación, Sánchez anunciou novas protestas, incluíndo unha concentración nos próximos días fronte ao xulgado e ás oficinas centrais de Losán na Coruña. A semana pasada, os traballadores xa se concentraron diante do edificio administrativo da Xunta en Monelos, reclamando unha reunión con todas as partes para deseñar un plan de viabilidade real e con futuro, algo que veñen esixindo dende hai meses.
