Os responsables municipais alertaron sobre os importantes danos rexistrados en varios elementos do mobiliario urbano e infraestruturas municipais durante os últimos días. Estes incidentes prexudican directamente os servizos esenciais e as áreas de lecer, o que supón un impacto negativo para todos os veciños e veciñas do municipio.
“"Estes espazos son de todos e o seu mantemento págano os veciños cos seus impostos, polo que non podemos permitir que o incivismo duns poucos deteriore a convivencia e o patrimonio do Concello de Curtis."
Entre os lugares afectados atópanse os elementos de xogo do Parque Infantil do Penedo de Teixeiro, a tematización instalada por Mariñas Coruñesas na senda de O Carregal, tamén en Teixeiro, e as pistas de pádel de Curtis. Ademais, o ximnasio municipal sufriu estragos no seu acceso traseiro.
Actualmente, os servizos municipais están a realizar unha valoración económica detallada de todos os danos materiais. Unha vez finalizada esta avaliación, o Concello de Curtis presentará a correspondente denuncia ante a Garda Civil para que se inicien as investigacións necesarias e se poida identificar os responsables.
O goberno local solicitou a colaboración cidadá para identificar os autores destes actos. Pídese a calquera persoa que puidese presenciar movementos sospeitosos ou que teña información relevante que se poña en contacto coas autoridades ou coas oficinas municipais, garantindo total confidencialidade, co obxectivo de evitar que este tipo de comportamentos se repitan.
