A decisión do executivo municipal, tomada o 20 de marzo, chega tras o ditame favorable dos técnicos de Urbanismo. A compañía instalarase nunha parcela apta para urbanizar, moi próxima á estación de servizo Piadela II, nun ámbito cun proxecto de urbanización aprobado desde 2007.

O proxecto contempla a construción dunha nave e a habilitación dun garaxe para camións, cun orzamento de execución estimado en 236.627 euros. A empresa dispón dun prazo de seis meses para iniciar os traballos e de tres anos para finalizalos.

Esta nova instalación situarase nas proximidades dun aparcadoiro de seguridade para camións, habilitado recentemente por unha empresa do sector, o que reforza a infraestrutura loxística da zona. A chegada desta compañía prodúcese nun momento de reactivación para o polígono de Piadela, que rexistrou un notable incremento de actividade no último ano.

Ademais, o Concello de Betanzos tamén autorizou en marzo a ampliación das instalacións dunha coñecida panadería local, que construirá unha nova nave para aumentar a súa produción con catro liñas adicionais. Este proxecto, cun orzamento de 800.000 euros, incluirá un almacén frigorífico e disporá dunha superficie total de 5.432 metros cadrados.