A convocatoria superou as expectativas, reunindo a unha gran cantidade de veciños, familiares e amigos que responderon á chamada da asociación. A presidenta da Xunta Local, Carmiña, xunto coas outras sete integrantes do equipo, destacou a importancia da resposta cidadá para continuar co labor que a Aecc leva desenvolvendo en Curtis durante máis de 40 anos.
As principais funcións da xunta local céntranse en informar, axudar e recadar fondos. Informan a través de charlas divulgativas con especialistas, campañas de prevención e dando a coñecer os servizos da Aecc, como o teléfono Infocáncer 900 100 036. Tamén axudan poñendo en contacto ás persoas que o precisan con quen pode ofrecerlles apoio, baixo o lema "Se loitas contra o cancro, tesnos aquí".
A recadación, considerada imprescindible para avanzar na investigación, foi un dos eixos centrais do evento. A presidenta agradeceu a colaboración de todos os asistentes, así como dos establecementos, empresas e particulares que aportaron regalos e donativos. Mencionou especificamente o apoio do Concello, a Federación de Atletismo, os internos da prisión de Teixeiro, a Xunta Local de Aranga, a Comisión das Festas Patronais de Teixeiro, o Salón de Belleza MARLOI, a Imprenta ROBERTO, o restaurante SABINO, a Sociedade Deportiva e Cultural de Teixeiro e a Floristería ANA.
O evento tamén incluíu un sorteo de regalos, cuxas rifas se correspondían cos números das entradas, e unha actuación musical da Sociedade Deportiva e Cultural de Teixeiro. A xornada rematou cun baile para que os asistentes puidesen gozar da tarde.
A presidenta tamén tivo un recordo emocionado para Celita, unha das integrantes orixinais do proxecto que xa non está presente, levada pola mesma enfermidade que se loita hoxe. "Dende onde esteas, Celita, que saibas que sempre te recordaremos", afirmou.
