A Facultade de Formación do Profesorado acolleu unha xuntanza para presentar os resultados do proxecto ASerES-Lugo (Aprendizaxe-Servizo con Entidades Socioeducativas para a formación de futuras/os mestras e mestres). A iniciativa busca conectar a formación universitaria coa realidade social da contorna, e os datos revelan un impacto positivo significativo.
Segundo a avaliación do curso 2025-2026, o 67,4% do estudantado participante experimentou unha mellora na súa autovaloración competencial. Ademais, o 100% dos estudantes valorou positivamente o impacto do proxecto en termos de empatía e respecto pola diversidade.
As entidades colaboradoras tamén destacaron os beneficios da iniciativa. O 75% sinalou a capacidade do proxecto para conectar a formación universitaria coa realidade social, mentres que o 62,5% resaltou a creación de vínculos e oportunidades de socialización entre a universidade e a comunidade.
O encontro serviu para presentar os resultados da avaliación e para que as organizacións presentásense ao novo estudantado dos graos en Educación Infantil e do Dobre Grao, que participará na edición 2026-2027. Destacouse a traxectoria do proxecto como unha das iniciativas de innovación docente e compromiso social máis recoñecibles da Facultade.
Organizacións como AECC Lugo, Cáritas Diocesana de Lugo, Alume Saúde Mental, Fundación Secretariado Gitano, Asociación Nacional Presencia Gitana, Down Lugo, Fundación JuanSoñador, Dano Cerebral Lugo, Cogami Lugo, Raiolas Lugo, Capaces Lugo, AFALU, Cruz Vermella, Fundación Breogán, ADC Fonte do Rei e a Asociación Michos de Lugo, entre outras, explicaron a súa misión e as actividades de colaboración.
O proxecto fortalece as relacións entre a Universidade de Santiago de Compostela e a comunidade lucense, promovendo unha formación docente baseada na experiencia, a colaboración e o compromiso social.
