A resolución da Consellería de Medio Ambiente e Cambio Climático conclúe que non se prevén impactos adversos significativos na contorna se se cumpren os condicionantes fixados no informe ambiental e na documentación avaliada. Este informe de avaliación de impacto ambiental simplificada (IIA) foi elaborado tras someter a documentación a participación pública e consultar organismos interesados.
O IIA non exime ao promotor da obriga de obter todas as autorizacións, licenzas, permisos ou informes legalmente exixibles para a execución e desenvolvemento do proxecto. A resolución será remitida ao órgano substantivo e publicarase nos vindeiros días no Diario Oficial de Galicia e na páxina web da Consellería.
O proxecto, que ocupa máis de 173.000 metros cadrados, dos cales máis de 44.700 se destinarán a zonas verdes, inclúe a construción de glorietas e ramais, o acondicionamento de parcelas, a creación de zonas de aparcamento e melloras en saneamento e abastecemento de augas.
As avaliacións consideran que o proxecto é viable sempre que se cumpran os condicionantes establecidos nos informes respecto á protección da atmosfera, poboación e saúde; da auga e leitos fluviais; do patrimonio cultural; xestión de residuos e integración paisaxística e restauración.
