A Xunta de Galicia vén de publicar no Portal de Contratos de Galicia a licitación de oito novos equipos de mamografía, cun investimento de 3.146.000 euros. Con este equipamento, o Executivo galego busca reforzar a capacidade de diagnóstico do Programa galego de detección precoz do cancro de mama.
Os novos equipos de mamografía instalaranse en seis hospitais comarcais da rede sanitaria pública galega: Cee, Barbanza, A Mariña, Verín, Valdeorras e Salnés. Ademais, substituiranse os equipos actuais do Hospital Abente y Lago na Coruña e do Hospital Meixoeiro en Vigo.
A tomosíntese mamaria, tamén coñecida como mamografía 3D, é unha técnica avanzada de diagnóstico por imaxe que permite obter unha reconstrución tridimensional da mama mediante a adquisición de múltiples imaxes de raios X desde distintos ángulos. A diferenza da mamografía dixital convencional (2D), que proporciona unha imaxe plana, a tomosíntese xera imaxes en capas finas que facilitan a visualización do tecido mamario.
Entre as principais vantaxes desta tecnoloxía destacan unha maior precisión diagnóstica en mamas densas, ao reducir o efecto da superposición de tecidos; a diminución de falsos positivos, o que reduce a necesidade de repetir mamografías ou realizar biopsias innecesarias; e unha maior precisión na detección precoz do cancro de mama, ao facilitar a identificación de lesións e tumores de pequeno tamaño.
As empresas interesadas neste procedemento teñen de prazo ata o vindeiro 23 de outubro para presentar as súas ofertas.
