A conselleira de Medio Ambiente e Cambio Climático, Ángeles Vázquez, e o alcalde de Coristanco, Juan Carlos García, mantiveron unha reunión para avaliar os últimos pasos na tramitación ambiental do proxecto do futuro parque empresarial do municipio. O departamento autonómico informou de que xa rematou o período de participación pública e se recibiu o último informe pendente dos organismos consultados.
Unha vez revisada toda a documentación, o seguinte paso será a emisión do informe de impacto ambiental, que poñerá fin á tramitación do proxecto nun prazo máximo de tres meses. A Dirección Xeral de Calidade Ambiental e Sostibilidade será a encargada de emitir este informe.
Durante o encontro, tamén se abordaron outras cuestións de interese municipal relacionadas coas competencias da Consellería, especialmente no ámbito dos servizos de auga. Analizáronse as necesidades prioritarias do Goberno local en canto ao sistema de depuración en varios núcleos do concello e ás infraestruturas hidráulicas.
O alcalde comprometeuse a enviar a Augas de Galicia o proxecto municipal para a construción dunha Estación Depuradora de Augas Residuais (EDAR) que trate as augas residuais de varios núcleos próximos ao futuro parque empresarial, para a súa supervisión técnica.
Finalmente, Ángeles Vázquez lembrou as liñas de axudas que a Xunta convoca anualmente para apoiar ás entidades locais en materia de abastecemento, saneamento e depuración, destacando a colaboración técnica e económica de Augas de Galicia.
