O secretario xeral para o Deporte, Roberto García, participou na presentación do Edommo Surf Pro Razo 2026, unha proba da World Surf League que se está a celebrar ata o vindeiro domingo na praia de Razo, en Carballo, e que conta coa participación duns 150 deportistas.
Durante o acto, Roberto García felicitou á organización polo ascenso da proba de categoría, que nesta edición pasa de júnior a absoluta ao integrarse nas Qualifying Series 2.000 da World Surf League. Esta nova cualificación permite aos surfistas acumular puntos para mellorar a súa posición no ránking mundial e fortalece a presenza de Galicia no circuíto internacional de surf.
García tamén subliñou a relevancia do surf en Galicia, destacando o seu valor deportivo, a súa repercusión económica e a súa conexión cunha comunidade autónoma que dispón de preto de 1.700 quilómetros de costa. Sinalou ademais que a rexión rexistra máis de 2.600 licenzas de surf, das cales 1.208 pertencen a mulleres.
