A estrea absoluta da peza teatral, protagonizada por Evaristo Calvo, Víctor Mosqueira e Josito Porto, terá lugar ás 21,00 horas. A obra, que parte do tratado de Sun Zi, é unha sátira sobre o poder, o engano e os conflitos contemporáneos construída desde a farsa e o humor, baixo a dramaturxia e dirección de Carlos Santiago.
A montaxe conta co apoio da Axencia Galega das Industrias Culturais (AGADIC), representada no evento polo seu director, Jacobo Sutil, en nome da Consellería de Cultura, Lingua e Xuventude. O espazo escénico é de Marcelino de Santiago, Kukas, e o deseño de iluminación de Octavio Mas.
Previamente á estrea oficial, o xoves 22 de outubro ás 11,00 horas, ofrecerase unha función escolar. Ao remate da estrea, será entregado a Antonio Porteiro o premio Xograr de Outono 2026.
O Festival Internacional Outono de Teatro (FIOT) de Carballo, que celebra a súa 35ª edición, inclúe un programa de 43 espectáculos, oito estreas absolutas e nove en Galicia. A programación continuará o sábado 24 coa obra 'Vendrán los alienígenas y tendrán tus ojos' e o domingo 25 con 'Solo quería bailar'.
