O secretario xeral da Lingua, Valentín García, participou na apertura dos XXVIII Encontros para a Normalización Lingüística, organizados polo Consello da Cultura Galega coa colaboración da Xunta de Galicia. Baixo o lema Música, orgullo e identidade, García resaltou que a xuventude é un dos focos principais do Goberno galego para impulsar a presenza da lingua en diversos ámbitos.
O representante da Consellería de Cultura, Lingua e Xuventude fixo fincapé na colaboración con artistas que apostan por letras en galego e na posta en marcha de iniciativas no mundo dixital e deportivo. Lembrou que a Xunta está a crear unha liña de axudas destinada a entidades deportivas para fomentar o uso do idioma entre os seus participantes, familias e profesionais.
Ademais, García sinalou que estas disciplinas serven como ferramentas para que as persoas non nadas en Galicia se acheguen ao idioma e á cultura, integrándose socialmente. Neste sentido, anunciou que a Xunta lanzará o vindeiro ano 150 novos cursos de introdución á lingua e cultura galegas, co obxectivo de chegar a 2.000 persoas estranxeiras, tras as 1.500 da edición pasada.
Estas propostas encádranse nas 700 medidas do novo Plan de normalización da lingua galega, aprobado recentemente na Cámara galega co acordo da maioría de grupos parlamentarios, e para as que a Xunta de Galicia contará cun orzamento de 14,5 millóns de euros.
