A mostra, organizada pola Fundación Escola Universitaria de Relacións Laborais da Coruña coa colaboración do Concello, percorre a evolución das relacións laborais desde finais do século XIX ata a actualidade, con especial atención á súa incidencia na Coruña e ao papel das institucións na mellora das condicións laborais e o diálogo social.
O concelleiro Gonzalo Castro destacou a importancia de iniciativas que divulgan a historia social da cidade e poñen en valor o coñecemento. "Esta exposición permítenos comprender mellor a evolución dos dereitos laborais e recoñecer o traballo de xeracións de profesionais e entidades que contribuíron a construír unha sociedade máis xusta e máis avanzada. A Coruña conta cunha sólida tradición vinculada ás relacións laborais e á formación universitaria neste ámbito, un patrimonio que cómpre preservar e divulgar", sinalou.
A exposición dedica un espazo á Escola Universitaria de Relacións Laborais da Coruña, ao Colexio Oficial de Graduados Sociais da Coruña e Ourense e á Asociación de Centros Universitarios de Relacións Laborais e Ciencias do Traballo (ARELCIT).
Abórdanse tamén os retos actuais e de futuro vinculados á dixitalización e á intelixencia artificial, concluíndo coa presentación de EUHRIC, o Centro Europeo de I+D en Recursos Humanos, Relacións Laborais e Benestar.
No acto tamén participaron Demetrio Fernández López, vicepresidente do Padroado da Fundación Escola de Relacións Laborais da Coruña; Jesús Vázquez Forno, director da Fundación; Purificación Morgado, presidenta de ARELCIT; e José Lage Cerviño, presidente do Colexio Oficial de Graduados Sociais da Coruña e Ourense.
