O Servizo Galego de Saúde (Sergas) detectou, tras unha auditoría enerxética, diversas melloras posibles para acadar un maior rendemento e confort no edificio. O investimento estimado para a execución destas obras, que se prevé iniciar en 2027, rolda os 6,1 millóns de euros.
As actuacións proxectadas inclúen a substitución de muros cortina, a mellora das fachadas, o cambio de carpinterías e vidros, a instalación de iluminación LED, o illamento da cuberta e a substitución de climatizadores e enfriadoras para unha significativa diminución no consumo enerxético.
O prazo para a redacción do proxecto será de dous meses, contados desde a formalización do contrato. As empresas interesadas teñen ata o vindeiro 19 de novembro para presentar as súas ofertas.
