A sección terceira da Sala do Contencioso-administrativo do TSXG, xa renovada, emitiu unha sentenza que anula a resolución da Dirección Xeral de Planificación Enerxética e Recursos Naturais de febreiro de 2021, que declaraba inviable o proxecto de Cobre San Rafael. Segundo o tribunal, a administración autonómica realizou unha interpretación "sesgada" dun informe de Augas de Galicia e non outorgou o preceptivo trámite de audiencia á promotora.
Esta omisión é radicalmente nula ao privar ao promotor da última palabra ante un escenario de peche de proxecto.
A sentenza destaca que a Xunta ditou unha declaración de impacto ambiental (DIA) desfavorable sen conceder o prazo de 15 días para alegacións a Cobre San Rafael, o que supuxo unha "indefensión real". Ademais, o tribunal reprocha que se ignorou un documento técnico achegado pola promotora para rebater as conclusións da Dirección Xeral de Patrimonio Natural, incorrendo nunha "incongruencia omisiva".
Os maxistrados tamén critican a "actitude hermética" da administración e a "quebra no seu deber de dilixencia e o principio de proporcionalidade", o que xerou unha "inseguridade xurídica incompatible co Estado de Dereito". A resolución do TSXG ordena retrotraer o expediente á fase previa á declaración de impacto ambiental para que se lle dea audiencia á empresa e se valoren de forma motivada as súas alegacións e documentos técnicos.
