O incidente ocorreu arredor das 19:20 horas, cando un particular alertou ao 112 Galicia sobre o suceso. Segundo a información facilitada, unha persoa resultara ferida tras ser golpeada por un tractor na zona de O Coto, na parroquia de Branzá.

A pesar do impacto, o ferido atopábase consciente e non quedara atrapado. Ante a gravidade da situación, os xestores de emerxencias mobilizaron o 061, que desprazou un helicóptero medicalizado ata o lugar do accidente para proceder á evacuación.

Unha vez no punto, o equipo médico atendeu á persoa ferida e realizou o seu traslado aéreo. Ademais dos servizos sanitarios, tamén se presentaron no lugar axentes da Garda Civil e persoal da Agrupación de Voluntarios de Protección Civil de Arzúa para colaborar nas tarefas de asistencia e seguridade.