A conselleira de Vivenda e Planificación de Infraestruturas, María M. Allegue, e o alcalde, José Luis Gavilanes, asinaron hoxe o convenio para executar esta actuación, que se enmarca no Plan Hurbe. As intervencións buscan rexenerar e poñer en valor estes viarios, situados na contorna da Colexiata de Santa María a Real e no ámbito de protección do Camiño de Santiago.
As actuacións inclúen a actualización das instalacións urbanas para resolver problemas de saneamento e recollida de pluviais. Ademais, renovarase a instalación de alumeado público con luminarias LED, repoñerase a sinalética, pavimentaranse as rúas e instalarase mobiliario urbano. Tamén se prepararán preinstalacións para futuras reformas sen necesidade de intervir na pavimentación.
A conselleira Allegue destacou que o Plan Hurbe é un programa da Xunta para cooperar coas administracións locais en investimentos que melloren contornas urbanas e doten de equipamentos, co obxectivo de dinamizar o territorio e favorecer o reequilibrio territorial.
“"Esta é unha proposta para recuperar estes espazos e con iso transformar esta fermosa contorna, para favorecer que siga a ser punto de encontro da veciñanza e visitantes."
A Xunta achegará o 70% do investimento, preto de 190.000€, e tamén licitará e executará as obras. O Concello aportará o 30% restante, algo máis de 81.000 euros. A Administración autonómica comprometeuse a axilizar a tramitación para licitar e adxudicar canto antes os traballos.
