A Alameda de Allariz será o escenario principal desta festividade, que comezará ás 11:30h coa chegada das creacións florais. Veciños e visitantes poderán gozar da exposición durante toda a fin de semana, acompañada pola música do Grupo de Gaitas De Pé Feito e o canto das coplas satíricas por parte dos participantes ata as 13:30h.

A celebración inclúe dous certames con premios en metálico. O Certame de Maios está aberto a todos, individualmente ou en grupo, e as pezas deben seguir a construción tradicional con materiais como musgo, bugallos, xestas e flores. Repartiranse premios de 100 €, 50 € e 40 €.

O Concurso de Coplas divídese en dúas categorías: unha para nenos de 3 a 11 anos e outra para mozos e adultos a partir dos 12 anos. Os grupos, cun mínimo de oito persoas, cantarán as súas composicións na Alameda o mesmo día 30 de abril. Os premios para as coplas oscilan entre os 30 € e os 50 €.

As persoas interesadas en participar deben formalizar a súa inscrición na Casa da Cultura ata o 27 de abril. Para o concurso de coplas, é necesario entregar unha copia mecanografada no momento da inscrición. O veredicto do xurado, nomeado pola Concellería de Cultura, farase público o 4 de maio a través das canles habituais do concello.