A aplicación práctica da innovación para afrontar os desafíos do sector agroalimentario foi o eixo central da visita do director da Axencia Galega da Calidade Alimentaria, Martín Alemparte, ás instalacións de Pazo de Vilane, en Antas de Ulla (Lugo). Esta entidade representa o grupo operativo detrás do proxecto FUNTRAPA, centrado no uso de fungos parasiticidas para facilitar a transición de gandarías a réximes pastorís.
O proxecto FUNTRAPA, que recibiu unha axuda de 180.000 euros da Consellería do Medio Rural, obtivo unha mención especial no V Foro de Innovación Agraria Galicia 2025, na categoría de gandarías e industrias agroalimentarias. Alemparte subliñou que a clave está en trasladar o coñecemento científico ás explotacións para solucionar problemas concretos.
Na iniciativa FUNTRAPA participaron, ademais de Pazo de Vilane, a Asociación Prodeme, o grupo de investigación COPAR da Universidade de Santiago de Compostela, e a Fundación Empresa-Universidad Gallega (FEUGA).
O foco de FUNTRAPA estivo no control biolóxico dos endoparásitos que afectan a aves poñedoras e ao gando porcino en sistemas de pastoreo. A estratexia consistiu en estudar o emprego de fungos presentes de forma natural no contorno como ferramenta de control. As solucións ensaiadas incluíron a aplicación de esporas nos aloxamentos e zonas de pastoreo, así como o tratamento de sementes forraxeiras.
Os resultados demostraron o potencial desta estratexia para diminuír o risco de infección por endoparásitos, avanzando cara a alternativas preventivas e máis sostibles na gandararía.
FUNTRAPA enmárcase na convocatoria de Grupos Operativos da Asociación Europea da Innovación, onde a Consellería do Medio Rural apoiou 25 proxectos cun investimento público de case 4,3 millóns de euros. Alemparte destacou que este instrumento fomenta a cooperación entre o sector produtivo e os centros de investigación para probar solucións en condicións reais.
“"Innovar non é simplemente investigar, senón conseguir que o coñecemento dea resposta a problemas reais e que esas respostas poidan chegar ao sector."
