O acordo, asinado o pasado 29 de outubro en Pontevedra, destina fondos da Deputación para executar o proxecto «Mellora da accesibilidade en Rosalía de Castro e Bueixos». A Deputación financiará a totalidade da obra a través de dúas liñas de axudas: 682.000 euros do Plan Provincia Extraordinaria – Plan Extra e 359.779,48 euros do Plan + Provincia 2026-2027, distribuídos en dúas anualidades.
O Alcalde cualificou o convenio como «un paso necesario para continuar transformando os principais viarios do núcleo urbano, converténdoos en espazos accesibles e pensados para as persoas». O investimento total do proxecto ascende a 1.041.779,48 euros, dos que 1.011.015,23 euros corresponden á execución das obras e 30.764,25 euros aos honorarios técnicos.
O proxecto desenvólvese en tres fases. A primeira actuará na rúa Rosalía de Castro (1.339,45 m2) para mellorar pavimentos e condicións de circulación peonil, cunha configuración de plataforma compartida, beirarrúas de lousa de granito e calzada de formigón desactivado.
A segunda fase centrarase nos camiños de conexión entre Rosalía de Castro e Os Bueixos (914,53m2), mellorando a continuidade dos itinerarios peonís. A terceira fase renovará os viarios interiores de Os Bueixos (1.095m2) con adoquín de granito e bandas de lousa, respectando o carácter tradicional do lugar e mellorando a drenaxe e o mobiliario urbano.
O conxunto das actuacións reforzará a conexión peonil entre o centro da Caniza e Os Bueixos, mellorando a accesibilidade ao longo do itinerario.
