O delegado territorial de Lugo, Alfonso Villares, participou hoxe na presentación da nova edición do festival, destacando o apoio da Xunta a través do programa O Teu Xacobeo 2026. A proposta musical complétase cun programa de actividades pensadas para todas as idades.
A Praza da Catedral será o escenario principal das actuacións musicais, que comezarán ás 13,30 horas con Familia Caamagno e Duendeneta. Pola noite, a partir das 21,00 horas, actuarán Mercedes Peón, ünder & Diego Flâneur, Las Petunias e Sedientos de Cumbia.
Ademais, a Praza do Concello acollerá ás 18,30 horas un magosto e foliada amenizados por Meniñ@s da Mariña, Os Carricantos e un espectáculo de maxia de Aris Villarino. Ao longo da xornada tamén haberá catas gastronómicas, roteiros e obradoiros de serigrafía e olaría no barrio dos Muíños.
