O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas, correspondente á semana que rematou o 18 de outubro, sinala que a actividade gripal na comunidade mantén o seu nivel basal cunha tendencia crecente. Non obstante, constátase un descenso na dispensación de antigripais nas farmacias galegas.
A taxa de dispensación de antigripais nas farmacias descendeu un 19 % na última semana, mentres que a de probas de antíxenos se reduciu nun 21,9 %. Estes datos proveñen das oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
Segundo o informe do departamento sanitario galego, a taxa de consultas por gripe aumentou un 10,2 % respecto da semana anterior, situándose en 13,2 consultas por cada 100.000 habitantes. O incremento da taxa de consultas por gripe produciuse nos grupos de idade de 5 a 19 anos, de 20 a 59 e no de 60 a 79 anos. As maiores taxas obsérvanse agora no grupo de 5 a 19 anos. A área sanitaria de Lugo rexistrou a maior taxa de consultas.
Respecto á covid, a taxa de consultas diminuíu un 22,4 %, pasando de 27,7 a 21,5 consultas por cada 100.000 habitantes. Este descenso observouse en todos os grupos de idade, sendo o grupo de maiores de 80 anos o que presentou un maior número de consultas, con 38,7 por cada 100.000 habitantes. A taxa de consultas por covid descendeu en todas as áreas sanitarias, agás na área de Pontevedra e o Salnés. A área con maior taxa foi a de Ourense con 30,1 consultas por 100.000 habitantes.
En canto aos ingresos por gripe, notificáronse 89 persoas (todas con virus do tipo A) ata a semana do 18 de outubro. A taxa de ingresos foi de 1,3 por 100.000 habitantes, lixeiramente superior á da semana anterior. O grupo de idade con maior taxa de ingresos foi o de máis de 80 anos (9,4 por 100.000 habitantes), e a área sanitaria de Lugo, A Mariña e Monforte de Lemos rexistrou a maior taxa (8 por 100.000 habitantes).
A taxa de ingresos por covid descendeu de 5,9 a 5,4 por 100.000 habitantes, manténdose estable en todos os grupos de idade. O grupo de maiores de 80 anos presentou a maior taxa de ingresos (31 por 100.000 habitantes). As taxas de ingresos por covid só aumentaron nas áreas de A Coruña e Cee; Lugo, A Mariña e Monforte de Lemos; e Pontevedra e o Salnés. As áreas con taxas máis elevadas foron Lugo (7,7) e Ourense (7,5) por 100.000 habitantes.
A positividade do virus da covid situouse no 17,6 %, o que supón un descenso respecto da semana anterior (20,3 %). A Xunta iniciou a campaña de vacinación nas residencias de maiores e centros de discapacidade o 28 de setembro, e continúa coa inmunización infantil en centros de saúde e 75 colexios, así como para o persoal sanitario dende o 13 de outubro. Esta última semana tamén comezou a vacinación para persoas de 70 ou máis anos e para o persoal dos servizos de emerxencias sanitarias.
