O equipo de goberno de Ribadeo anunciou un investimento de 30.000 euros para acometer novas obras no pavillón da Rúa Alfredo Deaño. Segundo explicou o concelleiro de Deportes, Francisco José Silvent, a intervención centrarase en solucionar problemas nas baixantes, que foron a causa das incidencias detectadas no hall de entrada e no corredor cara os baños.
Silvent rexeitou as acusacións do BNG sobre a existencia de goteiras na pista deportiva, asegurando que "na pista non hai goteira algunha". Engadiu que a empresa que realizou as obras de mellora do pavillón xa arranxou "todos os problemas que puideran ter aparecido". O concelleiro tamén sinalou que, de non ser pola "máxima deixadez e despreocupación" do anterior goberno do BNG, poderíanse estar a realizar novos proxectos en lugar de ter que "actualizar e arranxar todo o que deixou pendente" o anterior equipo.
O edil ribadense insistiu en que a única zona afectada por goteiras é o hall e o corredor, e que a problemática actual se debe a un "problema nas baixantes, que si se tivera arranxado no seu momento non tería ocasionado esta problemática". Tamén mencionou que se están a realizar melloras noutras instalacións deportivas como o pavillón de Cubelas e o campo de fútbol, ademais do mantemento diario de todas as dependencias.
