A transformación da Avenida de América, un dos principais accesos a Ribadeo, xa comezou. Durante o horario de traballo dos operarios, o carril de saída da localidade permanecerá cortado, polo que o goberno municipal pide comprensión aos veciños e lembra que existen outras rutas alternativas.
As obras iniciáronse no extremo da rúa próximo á rotonda do Juanín. Un cartel informativo sinala o corte do carril da Avenida de América e suxire aos condutores utilizar a rúa Rafael Fernández Cardoso para dirixirse cara á A-8 ou a N-634. O alcalde, Dani Vega, destacou que "as saídas son múltiples nesta vila" e apelou á colaboración cidadá para unha obra que cualifica de "fundamental e prioritaria" para mellorar a entrada a Ribadeo e facilitar o acceso ao novo centro de saúde.
Vega subliñou que o corte afectará unicamente ao carril de saída "cando sexa preciso" e que, unha vez rematada a xornada laboral, o tráfico se restablecerá. O horario laboral esténdese ata as seis e media da tarde, e os venres a circulación normalízase a partir da unha da tarde.
Esta remodelación integral da entrada a Ribadeo incluirá a creación dunha nova rotonda diante da gasolineira para dar acceso ao futuro centro de saúde. Tamén se mellorará o saneamento e o abastecemento, unha partida "fundamental" debido aos problemas existentes na zona, ademais de renovar o pavimento, as beirarrúas, a iluminación e o mobiliario urbano.
O alcalde recoñeceu que as obras causan "molestias", pero asegurou que se intentará "que molesten o menos posible". Explicou que a execución era necesaria canto antes, xa que a Xunta de Galicia esixía ter as infraestruturas do contorno arranxadas para conceder o centro de saúde. A obra, financiada pola Xunta, debe realizarse nestes meses para non perder o orzamento.
