A trigésimo sexta Semana Náutica de Ribadeo arranca o vindeiro sábado e estenderase ata o día 14 de agosto. Este ano, a cita conmemora o centenario do nacemento do expresidente Leopoldo Calvo Sotelo, dada a súa vinculación coa vila e o Real Club Náutico, así como a súa afición á navegación na ría.
Agárdase a participación de máis de 600 regatistas en diferentes trofeos, non só locais senón tamén procedentes de Baiona, Castropol ou Figueras, segundo indicou o presidente do club, Pablo Fernández.
As probas de vela lixeira comezarán o sábado co trofeo de optimist. O domingo disputaranse o de vaurien e o da Diputación en vela tradicional. Nesta modalidade, o día 5 celebrarase o trofeo dedicado a Calvo Sotelo e o día 8 o do Concello de Ribadeo.
As regatas de vela cruceiro inícianse o día 4 co trofeo Acisa. O día 7 terá lugar o de Paradores e o día 9 o Hyupersa Norte. A travesía a Tapia, co trofeo Abanca, está programada para o 13.
Ademais das regatas, haberá outras actividades. O día 8 haberá bautismos de mergullo organizados polo CAS Costa de Lugo, para os que é necesario inscribirse antes do día 4. O club Illa Pancha ofrecerá o día 11 unha xornada sobre protección do fondo mariño.
A xornada do 14 incluirá a regata Zalea a Abres e será o último día do evento, que pechará co concurso de pesca e a correspondente entrega de trofeos.
