Unha manta eléctrica foi a causa dun lume que se desatou na madrugada do sábado ao domingo nun piso situado na Rúa José Vicente Pérez Martínez, no centro urbano de Ribadeo, preto do Hotel Bouza. Afortunadamente, ningunha persoa resultou ferida no suceso.
Os feitos ocorreron pouco antes das doce da noite, cando un particular alertou ao 112 Galicia tras observar fume saíndo de dúas fiestras dun piso dun edificio na devandita rúa, fronte á praza de abastos. Outras chamadas indicaban que as persianas da vivenda estaban danificadas polo lume.
O 112 Galicia activou un dispositivo de emerxencia que incluíu aos Bombeiros de Barreiros, a Garda Civil e a Policía Local. Tamén se informou ao Servizo de Urxencias Sanitarias de Galicia-061, aos Bombeiros de Viveiro, ao persoal de incendios provincial e á Agrupación de Voluntarios de Protección Civil da localidade, aínda que finalmente non foi necesaria a intervención de todos eles.
Os bombeiros comunicaron que extinguiron o foco principal cun extintor. Como resultado, o salón da vivenda quedou completamente calcinado e o resto do piso sufriu danos significativos debido á afectación do fume.
