Desde o Concello de Ribadeo fanse chamamentos á paciencia, á prudencia e ao sentido común para a observación da eclipse solar que terá lugar mañá, 12 de agosto. Pídese que se teñan en conta as indicacións dos servizos de Policía Local, Protección Civil, Garda Civil, empregados de Tragsa e axentes medio ambientais da Xunta de Galicia.
O xefe da Policía Local subliñou as zonas de exclusión: "a pasarela do Cargadoiro e o acceso á Illa Pancha estarán pechados, así como a praia das Catedrais e as súas pasarelas e os sendeiros de todo o monumento natural, que serán vixiados por persoal de Tragsa e axentes medio ambientais da Xunta. Pedimos paciencia, prudencia e moito sentido común".
O tráfico entre a rotonda das Catedrais en Ribadeo e o restaurante A Yenka en Barreiros estará cortado a partir das 15:00 horas e non se reabrirá ata a madrugada. Permitirase o tránsito a pé por ese tramo de estrada durante a tarde. Haberá tres aparcadoiros sinalizados e só se permitirá a circulación entre As Catedrais e Os Castros, en sentido Ribadeo.
Os autobuses chegarán ao entorno das Catedrais, deixarán aos pasaxeiros e recolleranos ao remate da eclipse, sen aparcar na zona. A concelleira de Seguridade, Montse Seijo, recomenda planificar o desprazamento, agruparse en poucos vehículos e chegar á zona antes das 19:00 horas para evitar aglomeracións e facilitar o traballo dos equipos de seguridade.
A concelleira de Turismo, Marta Saiz, indicou que haberá servizos e reforzos especiais entre Ribadeo, Foz e Lugo e a praia das Catedrais para facilitar os desprazamentos. Toda a información está dispoñible nas páxinas webs e redes do Concello de Ribadeo e da empresa Arriva.
A edil ribadense insistiu na importancia do sentido común para presenciar este "fenómeno histórico" de forma segura, empregando gafas homologadas e seguindo os consellos dos profesionais. Advertiu sobre os riscos de facer selfies ou fotos desde cantís, xa que "todo risco innecesario se multiplica" pola noite.
A concelleira de Igualdade, Begoña Sanjurjo, anunciou a instalación dun Punto Violeta a través do Centro de Información ás Mulleres (CIM), que estará situado no aparcadoiro do areal entre as 21:00 e as 00:30 horas, para garantir un ambiente de respecto e seguridade.
O programa nas Catedrais dividirase en dúas partes. A primeira será divulgativa, cunha conexión simultánea por streaming co Altar do Sol en Lalín. O profesor José Ángel Docobo e a astrónoma Paula Cambeses guiarán en directo a observación do eclipse e explicarán o fenómeno das Perseidas. A primeira intervención dos científicos será ás 19:15 horas.
A segunda parte, tras o eclipse, estará dedicada á música coa retransmisión dun programa da TVG con Panorama City, Francisco e 9Louro. Para asistir, será necesario recoller unha pulseira no recinto a partir das 15:00 horas.
O Concello de Ribadeo solicita aos asistentes chegar con antelación (antes das 19:15 horas), agruparse en poucos coches, utilizar exclusivamente gafas específicas para eclipses homologadas (norma EN ISO 12312-2:2015) e seguir as instrucións dos especialistas. Non se deben usar gafas de sol convencionais nin filtros caseiros.
Recoméndase tamén aplicar crema de protección solar, levar roupa e calzado cómodos, unha cadeira pregable se é necesario, e unha prenda de abrigo para a noite. Pídese respectar as instrucións da Policía Local, Garda Civil, Protección Civil e persoal de organización, e vixiar especialmente os menores para o uso correcto da protección ocular.
A concelleira de Seguridade, Montse Seijo, conclúe pedindo responsabilidade para gozar "dunha xornada que quedará na memoria de Ribadeo", respectando o entorno natural e evitando deixar lixo.
