O incidente produciuse arredor das tres menos vinte da tarde do sábado, cando o vehículo se saíu da vía no quilómetro 33 da citada estrada. A pesar da espectacularidade do envorco, o condutor puido abandonar o camión polos seus propios medios.

O 112 Galicia recibiu o aviso dun particular que informou do suceso, indicando que o condutor xa se atopaba fóra do habitáculo e que parte da carga de madeira estaba espallada pola calzada. Aínda que nun principio se comunicou que non había feridos, posteriormente solicitouse asistencia médica para o afectado debido a que o camión se arrastrou pola cuneta.

Ao lugar do accidente desprazáronse efectivos do Grupo de Emerxencias Supramunicipal (GES) de A Pontenova, que confirmaron que o vehículo quedara fóra da calzada, envorcado cara á beiravía, e que a madeira non obstaculizaba o tráfico. Tamén acudiron Urxencias Médicas do 061 para atender ao condutor, a Garda Civil de Tráfico e operarios do servizo de mantemento da vía para xestionar a situación.