O proxecto, denominado Identidades que suman: masculinidades saudables e convivencia xuvenil, comezou o pasado 20 de maio e está dirixido especificamente ao alumnado de 3º e 4º da ESO. A iniciativa xorde como resposta a unha demanda das familias e do profesorado, co obxectivo de previr condutas discriminatorias e violentas.
O programa estrutúrase en catro sesións semanais dunha hora de duración. As primeiras xornadas abordaron temas como a identidade, os estereotipos e a presión social, así como a xestión das emocións. As vindeiras sesións centraranse no impacto das accións na comunidade e na construción de identidades que sumen, facendo fincapé no coidado, o respecto e a responsabilidade individual.
“"Buscamos favorecer a expresión emocional, o desenvolvemento da intelixencia emocional e o fortalecemento do respecto mutuo entre iguais, que é moi importante que desenvolvan nestas idades."
A metodoloxía empregada está adaptada ás dinámicas adolescentes, buscando a participación activa do alumnado e fomentando unha mirada crítica sobre as relacións interpersoais. O programa busca impulsar a autorreflexión e a capacidade de discernir entre as diferentes realidades. Esta iniciativa conta co cofinanciamento da Consellería de Política Social e Igualdade e do Ministerio de Igualdad.
