O que comezou como un xogo infantil, imitando aos adultos, transformouse nun dos eventos máis significativos da Semana Santa de Viveiro. Cada ano, case 300 pequenos, vestidos con rigorosos hábitos, percorren as rúas da cidade do Landro na coñecida Semana Santa dos Nenos. Esta iniciativa non só recrea as procesións principais, senón que tamén asegura a continuidade da Xunta de Confrarías.
“"Os nenos están emocionadísimos, porque son os verdadeiros protagonistas."
María San Isidro, membro da Asociación Semana Santa dos Nenos, entidade organizadora, destaca a ilusión dos participantes. Para eles, é un momento único “despois de toda a Semana Santa grande, que eles xa sexan verdadeiros protagonistas”.
Esta particular celebración conta con máis de medio século de historia. Aínda que os seus inicios foron máis improvisados, foi na década dos 90 cando os veciños de Campo de Urraca decidiron impulsar a iniciativa para crear “unha Semana Santa máis parecida á de adultos, con réplicas para os nenos”.
O realismo destas procesións é notable, cunha estética “moi parecida á dos maiores”. Os nenos visten hábitos, como os dos franciscanos, e as nenas lucen mantillas “totalmente de loito rigoroso”, aínda que tamén hai algunha “de cor branca para a resurrección”, explica San Isidro. Cada detalle, dende os acólitos ata os atributos que portan, está coidadosamente preparado.
Esta paixón infantil é o motor que alimenta a Semana Santa de Viveiro, declarada de Interese Turístico Internacional, e xustifica o elevado número de confrades na cidade. A tradición está garantida, xa que os nenos levan a Semana Santa no sangue.
