O Concello da Coruña, a través dun convenio coa Fundación Manuel María de Estudos Galegos, presentou hoxe o novo Espazo Cultural Manuel María, situado na rúa do Socorro. Este centro nace coa vocación de ser un punto de encontro para a difusión da cultura galega e a dinamización social, inspirado nos valores de Manuel María e Saleta Goi.
Durante o acto inaugural, o concelleiro de Cultura e Turismo, Gonzalo Castro, destacou a importancia de sumar novos espazos á vida cultural da cidade. "A apertura deste espazo é unha excelente noticia para a Coruña", sinalou, subliñando que o proxecto "mantén viva a memoria de Manuel María, pero que mira claramente cara ao futuro, creando oportunidades para a formación, a creación artística e a promoción da nosa lingua e da nosa cultura".
Castro tamén puxo en valor o compromiso do Goberno de Inés Rey co ecosistema cultural, afirmando que "desde o Concello apoiamos todas aquelas iniciativas que contribúen a ampliar a oferta cultural, fortalecer o tecido asociativo e crear novos espazos de encontro para a cidadanía". Engadiu que este centro "enriquecerá a vida cultural da Coruña e axudará a seguir difundindo o legado dun dos autores fundamentais das nosas letras".
A inauguración coincide co aniversario do nacemento de Manuel María, ocorrido o 6 de outubro de 1929 en Outeiro de Rei. O novo espazo funcionará como centro de actividades culturais, formativas e divulgativas, aberto a todos os públicos. A súa programación inicial inclúe cursos de percusión tradicional galega, pandeireta e baile tradicional impartidos por Mario Figueira, así como a actividade de canto colectivo 'Cantar de cantares', coordinada por Rafa Seixo. Estas actividades serán gratuítas durante o resto de 2026.
Ademais, o espazo acollerá concertos, presentacións e encontros arredor da lingua, a literatura e a cultura galegas. Entre as primeiras citas programadas atópase o concerto 'De Manuel María a Begoña Caamaño', protagonizado por Uxía, acompañada por Santi Cribeiro e Sérgio Tannus, previsto para o vindeiro 16 de outubro.
Gonzalo Castro lembrou a estreita relación de Manuel María e Saleta Goi coa Coruña, onde residiron nos seus últimos anos. "Manuel María forma parte da mellor memoria cultural da nosa cidade. A Coruña foi a súa casa e esta nova iniciativa contribúe a manter vivo o seu pensamento, a súa obra e os valores de compromiso coa lingua, coa cultura e coa xustiza social que sempre defenderon el e Saleta", concluíu o concelleiro.
