O Diario Oficial de Galicia publicou hoxe a declaración destas seis moedas históricas, que forman parte da colección numismática de Antonio Orol, na categoría de moble singular. Estas emisións, descritas como "raras e únicas", constatan a presenza do Reino Suevo en Galicia e do medievo renacentista, e non se coñecen outros exemplares iguais ata o momento.
Técnicos da Dirección Xeral de Patrimonio Cultural sinalan no expediente que os elementos abranguen desde o período do reino suevo e visigodo, así como do período dos Reis Católicos e do reinado de Felipe II. Destacan que "a totalidade das moedas históricas obxecto da incoación presentan un excelente estado de conservación".
Entre as moedas, atópase unha emisión única que representa unha das poucas testemuñas materiais e documentais auténticas da existencia do Reino Suevo en Galicia, á que os técnicos recoñecen "un valor cultural senlleiro" polas súas características artísticas. Ademais, resaltan dúas pezas cuñadas na Coruña de "gran valor cultural e de rara cuñación".
A incoación inicial incluía sete moedas. Porén, a peza coñecida como 1/4 de excelente dos Reis Católicos, cuñada na Coruña, foi adquirida polo Ministerio de Cultura na poxa mediante o exercicio do dereito de tenteo, polo que pasou a formar parte das coleccións do Estado que se custodian no Museo Arqueolóxico Nacional.
Na actualidade, as seis moedas declaradas Ben de Interese Cultural están depositadas no Museo Arqueolóxico Provincial de Ourense.
