O alcalde, Fran Cajoto, destacou a implicación do Conde de Fontao coa localidade, sinalando que "é unha persoa que quere Foz e que sempre está disposto a colaborar con aquilo que se lle propón, participando en todas aquelas actividades que se organizan, sobre todo no ámbito cultural". Engadiu que "José Manuel sempre ten Foz presente".
A concelleira de Cultura, Inés López Couto, detallou o programa que arranca o xoves 6 de agosto coa actuación do grupo Mar Aberto na praza Rosalía de Castro ás nove da noite. O venres 7 será o pregón na mesma praza ás oito e media da tarde, seguido do concerto do grupo Pantera Rosa.
O sábado 8 comezará cunha sesión vermú na esplanada do porto co grupo Eric Hidalgo Prime, e pola noite haberá verbena co mesmo grupo e a orquestra Miramar. O domingo 9, a sesión vermú será coa orquesta Magos, que tamén actuará na verbena xunto a Finisterre.
O luns 10, día grande e festivo local, comezará cunha misa na igrexa parroquial ao mediodía, seguida de procesión con O Feitizo e sesión vermú con Platinum. A verbena será con Platinum e América de Vigo. A medianoite, o tradicional espectáculo de fogos artificiais iluminará o paseo marítimo, atraendo a numeroso público, e despois continuará a verbena.
O martes 11 pecharanse as verbenas co grupo Nostalgia na praza Conde de Fontao a partir das dez da noite. López Couto asegurou que "Chega agosto e con el o San Lourenzo a Foz; un mes cheo de actividades, de cultura, deportes e actividades de ocio".
Pola súa banda, o concelleiro de Xuventude, Ángel Fernández Neira, engadiu que ademais das festas haberá o programa Noites Alternativas e, previamente, os días luns, martes e mércores, un 'wipe out' no Campo da Cabana ás dez da noite, con inscricións abertas na web municipal.
O alcalde tamén avanzou que o cartel das festas "é un resumo do que é Foz" e que nos próximos días se darán a coñecer máis novidades para "completar as actividades do San Lourenzo" e dar ambiente á localidade.
