A investigación, iniciada a principios de ano baixo o nome de operación Zoco A7, permitiu identificar os membros da rede, as súas vías de subministro e distribución de sustancias estupefacientes.
Durante o operativo, os axentes lograron interceptar un envío de cocaína que presuntamente se dirixía ás localidades lucenses de Burela e Foz, especialmente durante o período estival.
O operativo culminou coa detención de sete persoas, con idades comprendidas entre os 27 e 45 anos, veciñas de Lugo e Asturias. Realizáronse tres rexistros en inmobles vinculados á organización.
Interviñéronse catro quilogramos de cocaína, 6.000 euros en efectivo, catro vehículos e unha arma de fogo. A valoración económica dos efectos intervidos aínda está pendente.
A operación foi dirixida polo equipo territorial da policía xudicial de Burela. As dilixencias, xunto cos detidos e os efectos incautados, foron postas a disposición do Tribunal de Instancia número 2 de Mondoñedo, que decretou o ingreso en prisión para seis dos arrestados.
