A Consellería de Cultura, Lingua e Xuventude da Xunta de Galicia licitou hoxe as obras de rehabilitación da Capela do Bispo Santo, situada en Foz (Lugo). A actuación conta cun orzamento de 92.792 euros para as obras, aos que se suman 8.500 euros investidos no proxecto.
O delegado territorial da Xunta en Lugo, Alfonso Villares, explicou que as empresas interesadas teñen de prazo ata o 13 de agosto para presentar as súas ofertas. Villares sinalou que a intervención principal centrarase na substitución da cuberta, que se dotará dun novo entaboado de madeira de castiñeiro con illante térmico e remate de lousa, co obxectivo de atallar as filtracións de humidades.
Ademais, restauraranse a espadana e a campá, as portas, e os marcos e contras das ventás. Tamén se abrirá un oco no almacén posterior e renovarase a instalación eléctrica e de iluminación con focos tipo led.
Alfonso Villares destacou o valor patrimonial da capela, situada no alto da Grela e incluída no Catálogo do Patrimonio Cultural de Galicia. "É un elemento esencial do patrimonio cultural, histórico e sentimental de Foz", afirmou, lembrando a tradición da súa romaría no mes de maio.
A capela, con referencias que datan de 1611, presenta unha planta rectangular, cun arco semicircular na porta principal e unha espadana dun só van. A súa cabeceira intégrase na cuberta, e os vans son escasos e estreitos, seguindo a tradición das ermidas rurais. No seu interior atópase un retablo barroco popular coa figura de San Gonzalo.
