Durante a protesta, os representantes das familias expuxeron as graves carencias que sofre o colexio na actualidade. Entre as demandas principais atópanse a renovación dos baños, a mellora da accesibilidade e a resolución de deficiencias enerxéticas que afectan ao confort do alumnado.
Outra das reivindicacións centrais é a necesidade de contar cun espazo cuberto en condicións axeitadas para o recreo e as actividades dos nenos e nenas. A comunidade educativa manifestou o seu cansazo ante a necesidade de acostumarse a unhas instalacións que consideran insuficientes para o día a día escolar.
“"A infancia non espera. Estamos aquí polos nosos fillos e fillas. Polo profesorado. Polo equipo directivo. Por todas as persoas que sosteñen este centro cada día cun enorme esforzo."
Ante esta situación, representantes políticos locais e autonómicos anunciaron que levarán as demandas do centro ao Parlamento de Galicia. O obxectivo é trasladar á cámara galega a necesidade dunha intervención integral que garanta unhas condicións dignas para toda a comunidade educativa de Burela.
