A conselleira de Vivenda e Planificación de Infraestruturas, María M. Allegue, xunto á directora xeral de Urbanismo, Encarnación Rivas, formalizou a aprobación coa alcaldesa de Porqueira, Susana Vázquez, o pasado martes. Este plan dota ao municipio dunha ferramenta eficaz para garantir un crecemento ordenado e respectuoso co territorio.
“"Non hai crecemento ordenado sen unha planificación rigorosa."
O PBM de Porqueira foi recoñecido o ano pasado co premio do Colexio Oficial de Arquitectos de Galicia (COAG) na categoría de Planificación Urbana, destacando a súa calidade na ordenación territorial e o desenvolvemento sostible. Ademais, o documento está actualmente a optar aos Premios Arquitectura 2026.
Este plan delimita 31 núcleos (tradicionais, comúns e mixtos) e 6 parroquias no concello, e inclúe a catalogación de 164 elementos, dos cales 3 son Bens de Interese Cultural. A Xunta subliña que o PBM proporciona seguridade xurídica á veciñanza, simplifica a xestión urbanística e xera novas oportunidades para o progreso económico e social de Porqueira.
Con esta aprobación, Porqueira convértese no sexto concello galego en contar cun Plan Básico Municipal aprobado definitivamente, sumándose a Trabada, Riotorto, Ribeira de Piquín, O Páramo e Alfoz. Outros municipios como San Xoán de Río están próximos á aprobación, mentres que 14 teñen o plan en fase de aprobación inicial e 3 están en avaliación ambiental estratéxica.
