A proposta, consensuada previamente, busca habilitar un museo da conserva nunha das antigas conserveiras que se atopan en desuso no porto de Cariño. O encontro celebrouse esta mañá na sede de Portos de Galicia en Santiago de Compostela.
O convenio de colaboración articulará a cesión da nave, situada en dominio público portuario, para a finalidade museística. Botana informou a López da documentación sectorial necesaria para recuperar a edificación para a actividade cultural.
Ambas administracións coincidiron na importancia de iniciar canto antes a tramitación da rehabilitación e mellora do edificio, que actualmente se atopa en estado de abandono e presenta danos na cuberta, para evitar o seu colapso.
Subliñouse o valor tradicional da actividade conserveira como patrimonio marítimo inmaterial na vila de Cariño e na historia portuaria de Galicia.




