O Concello de Oleiros destinará 22,8 millóns de euros a un significativo investimento en novas obras e servizos, priorizando a conservación e mantemento de equipamentos e infraestruturas públicas. As actuacións incluirán asfaltados, creación de novas beirarrúas, renovacións da iluminación pública, melloras en parques e instalacións deportivas, sociais e culturais, obras de eficiencia enerxética en edificios municipais e renovacións de redes de abastecemento de auga, saneamento e pluviais.
Destacan proxectos como a rexeneración das rúas da zona do Mercado en Perillo, a renovación da rede de augas en Montrove, a reurbanización completa do Paseo de Santa Cristina e das rúas Víctor López Seoane e Mendel, a senda costeira entre Naval e Canide, a renovación do paseo da ría entre A Fábrica e Agramar, a última fase das beirarrúas en Bartolomé de las Casas, e a renovación das cubertas do pavillón Valle-Inclán, da polideportiva Meixonfrío e da polideportiva de Iñás.
En canto aos ingresos, prevese un incremento do 15% nos impostos indirectos, un 21% nas transferencias correntes (debido ao aumento das achegas do Estado) e un 22% nas transferencias de capital (por máis recursos da Deputación e da Unión Europea). Tamén se prevé duplicar a venda de parcelas municipais. Inclúese un pasivo financeiro, aínda que se estima que non será necesario utilizalo, como en anos anteriores, ante a previsión de incorporar os remanentes de Tesourería tras o peche do exercicio 2026.
Estes orzamentos, presentados hoxe polo alcalde nunha asemblea con entidades veciñais, culturais, deportivas e comisións de festas, son unha aposta clara polo mantemento e mellora dos actuais servizos e infraestruturas públicas. O incremento orzamentario susténtase na suba de recursos obtidos do Estado, a Deputación e a Unión Europea, así como nunha maior recadación por impostos indirectos e venda de parcelas.
Os gastos totais ascenden a 37.052.235 €, desglosados en Persoal (14.152.785 €), Gastos correntes (18.852.385 €), Gastos financeiros (45.010 €), Transferencia correntes (1.692.050 €) e Fondo continxencia (350.000 €). Os investimentos reais suman 22.877.540 €, con transferencias de capital (30.000 €) e activos financeiros (36.000 €).
Os ingresos totais previstos son de 49.557.606 €, incluíndo Impostos directos (13.162.000 €), Impostos indirectos (2.800.000 €), Taxas e prezos públicos (3.552.850 €), Transferencias correntes (17.888.306 €), Ingresos patrimoniais (508.000 €), Alleamento invest. Reais (2.094.279 €), Transferencias capital (6.705.921 €) e Activos financeiros (36.000€). Figuran tamén Pasivos financeiros por 11.288.413 €.
