A competición, que combina deporte de base e alto nivel, foi destacada polo concelleiro de Deportes, Manuel Vázquez, como un evento que consolida A Coruña como sede deportiva internacional. "O Goberno de Inés Rey continúa apoiando competicións que contribúen a promover o deporte entre a mocidade e que, ao mesmo tempo, proxectan a imaxe da cidade a nivel estatal e internacional", sinalou o edil, engadindo que o trofeo é xa unha referencia para a halterofilia galega.
O trofeo leva o nome de Ferenc Szabó, técnico húngaro que dedicou máis de tres décadas á formación de deportistas na cidade, sendo un referente para o Club Halterofilia Coruña e a halterofilia galega. A súa traxectoria inclúe a formación de atletas que acadaron éxitos en campionatos nacionais e internacionais. Na actualidade, preside a Escola Nacional de Adestradores de Halterofilia e foi recoñecido pola Real Federación Española de Halterofilia coa Insignia Olímpica.
A programación dividirase en dúas sesións. Pola mañá, o Criterium de Promesas Ferenc Szabó reunirá a uns 60 deportistas das categorías sub-15 e sub-17 de clubs galegos. A competición comezará ás 9.30 horas para os masculinos e ás 11.30 horas para as femininas, coa entrega de trofeos ás 13.00 horas.
Pola tarde, o Trofeo Internacional Ferenc Szabó contará coa participación de once equipos de Galicia, doutras comunidades autónomas e de países como Alemaña, Hungría, Italia, Malta e o Reino Unido. Entre os participantes atópanse clubs como Urbis (Biscaia), CDUS (Salamanca), CH Cambre, St Birinus (Gran Bretaña), unha selección de Budapest, unha selección de Malta, un equipo de Parma (Italia), a selección galega e os combinados A e B do Club Halterofilia Coruña.
A competición internacional comezará ás 16.00 horas e a segunda quenda ás 18.00 horas, coa entrega de premios prevista para as 19.30 horas. Destacará a presenza de deportistas internacionais como Paula Canedo e Digna Silo (subcampioas de Europa sub-15), Ruth Fuentefría (subcampiona do mundo sub-17), Eduarda Souza (medallista panamericana) e Lavina Magistris (medallista europea sub-17).
