A Casa Arambillet, construída en 1912 e deseñada por Antonio López Hernández e Julio Galán y González Carvajal, é unha das fachadas máis fotografadas e recoñecibles da Coruña. Situada no número 13 da praza de Lugo, este inmoble é considerado o edificio máis centroeuropeo da cidade e agora unha das súas vivendas está dispoñible no mercado.
O apartamento, localizado no terceiro andar, conta con catro habitacións e unha superficie de 187 metros cadrados. A inmobiliaria encargada da venda, Coldwell Banker, subliña que a propiedade “respira historia, carácter e distinción en cada un dos seus espazos”, destacando a súa rica ornamentación inspirada no modernismo inglés e na pintura prerrafaelita.
“"Trátase dun edificio modernista cunha rica ornamentación inspirada no modernismo inglés e na pintura prerrafaelita, onde destacan abundantes rostros femininos e delicados motivos decorativos de aves e flora. Estes elementos confiren á fachada e aos seus espazos comúns unha identidade artística única, de gran valor patrimonial."
A vivenda conserva elementos orixinais de gran valor arquitectónico, como unha “exquisita marquetería artesanal e parte dos seus chans orixinais perfectamente integrados, que achegan autenticidade e elegancia”. Os teitos altos e os amplos ventanais contribúen á luminosidade natural, realzando a amplitude e a nobreza das estancias. A distribución equilibrada e funcional ofrece ambientes acolledores e versátiles.
O prezo de venda sitúa o metro cadrado en 4.278 euros. Aínda que non é accesible para todos os petos, non é a vivenda máis cara da Coruña, xa que existen outras propiedades que roldan os dous millóns de euros. Con todo, a Casa Arambillet segue sendo un dos edificios máis emblemáticos e admirados, protexido polas ordenanzas municipais.
