Un camión guindastre sufriu un espectacular envorco na mañá deste luns, ao redor das 12:30 horas, mentres circulaba pola vía autonómica AC-552, á altura do núcleo arteixán de Meicende. O vehículo, por causas que aínda se están investigando, desequilibrouse cando transitaba polo interior dunha glorieta e caeu sobre o seu lado dereito.

Tras alertar o servizo de Emerxencias 112 Galicia, estableceuse un dispositivo de seguridade no que participaron axentes da Policía Local de Arteixo, a Garda Civil de Tráfico e efectivos do parque comarcal de bombeiros de Arteixo.

Aínda que o incidente se saldou unicamente con danos materiais, o condutor do camión experimentou certas dificultades para abandonar o interior do vehículo, xa que quedou suspendido polo cinto de seguridade.

Os traballos para equilibrar o camión guindastre e o seu posterior traslado do lugar do accidente prolongáronse durante aproximadamente unha hora. Tamén foi necesaria a limpeza do firme debido aos restos de gasóleo desprendidos.