A firma foi recoñecida polo desenvolvemento de Nadus, unha plataforma que facilita a xestión pedagóxica e administrativa dos cursos de natación, permitindo organizar grupos, programar sesións, avaliar o progreso do alumnado e comunicarse coas familias.
A entrega do galardón tivo lugar este xoves no Club Cámara Noroeste, durante a gala da XXVII edición do Premio Emprende AJE Coruña. No acto participou a deputada de Emprego, Industria e Medio Ambiente, Rosa Ana García López, quen destacou o apoio da Deputación ao emprendemento a través da Rede Provincial de Coworking.
Tribo Solutions está formada por tres enxeñeiros e desenvolve software a medida, sistemas de sensores e ferramentas de automatización con intelixencia artificial. O premio súmase a outros recoñecementos recentes da empresa como o Premio BF Sport á innovación e o selo INCIBE Emprende.
A Deputación da Coruña conta con 12 espazos de traballo colaborativo na Rede Provincial de Coworking, como o Pazo de Arenaza, para apoiar a persoas emprendedoras de distintos sectores.
