A Universidade da Coruña (UDC) deu inicio oficial ao proxecto TERRAVERSO. Laboratorio de Arte, Ciencia e Comunidade arredor do Patrimonio Literario Rural, unha iniciativa financiada pola Fundación Española para la Ciencia y la Tecnología (FECYT) co obxectivo de revitalizar o patrimonio literario rural galego.
Coordinado pola profesora María Andrade Suárez, o proxecto desenvolverase entre xullo de 2026 e xullo de 2028. A súa meta é converter as casas-museo e fundacións de escritores do medio rural en espazos vivos de encontro entre o patrimonio, a creación artística, a investigación e a participación cidadá.
TERRAVERSO nace da colaboración entre a UDC e a ACAMFE (Asociación de Casas-Museo e Fundacións de Escritores). Conta coa participación de cinco institucións clave: a Fundación Rosalía de Castro, a Fundación Eduardo Pondal, a Fundación Curros Enríquez, a Fundación Uxío Novoneyra e a Casa-Museo Otero Pedrayo.
O proxecto propón unha nova mirada ao patrimonio literario, concibindo as casas-museo non só como conservadoras da memoria dos autores, senón como xeneradoras de coñecemento, creatividade e implicación social. Ao longo dos próximos dous anos, realizaranse investigacións participativas, obradoiros de cocreación, actividades de mediación cultural e desenvolveranse ferramentas dixitais para explorar novas relacións entre literatura, territorio, paisaxe, memoria e cultura científica.
Entre as accións previstas inclúense entrevistas, paseos sonoros, obradoiros con artistas e comunidades locais, rutas dixitais, podcasts, materiais audiovisuais e unha plataforma web aberta para recoller os resultados.
A primeira fase do proxecto dedicarase ao diagnóstico participativo de cada territorio. Xa está dispoñible un cuestionario dirixido á cidadanía para coñecer a súa percepción sobre o patrimonio literario e o papel das casas-museo.
Representantes das cinco casas-museo xa participaron nun encontro de traballo na Fundación Eduardo Pondal, en Ponteceso, para definir as primeiras liñas de actuación. A filosofía de TERRAVERSO baséase na construción dunha rede colaborativa interdisciplinaria.
O equipo da UDC está composto por especialistas en socioloxía, comunicación, turismo, arquitectura e enxeñaría, que colaborarán con artistas, mediadores culturais e as comunidades locais.
“"TERRAVERSO pretende demostrar que o patrimonio literario pode converterse nunha ferramenta de innovación social e cultural. Queremos que as casas-museo sexan espazos onde literatura, ciencia, arte e cidadanía dialoguen para xerar novas formas de coñecemento e de participación no medio rural."
