A vicerreitora de Estudantes e Empregabilidade da UDC, María José Lombardía, destacou a importancia do programa para achegar o estudantado ás necesidades reais da contorna e fortalecer a conexión entre a universidade e os Polos de Emprendemento. Subliñou o éxito da primeira edición, na que participaron 52 entidades emprendedoras galegas e 182 estudantes da UDC rexistráronse na plataforma de U4IMPACT.
Presentáronse varios traballos desenvolvidos polo estudantado. Destacaron dous casos de éxito da Universidade da Coruña: o de Ariadna Díaz Terrazo, estudante do Mestrado en Bioinformática para Ciencias da Saúde, cuxo traballo desenvolve un sistema automático para organizar información sobre alteracións do ADN e axudar á comunidade científica a analizar datos médicos máis rápido; e o de Bruno Bouza Fernández, do Grao en Enxeñaría Informática, que deseñou e desenvolveu a plataforma dixital de MVICO, servizo de aluguer de bicicletas para o Camiño de Santiago. Este sistema, xa en produción, mellorou a eficiencia do negocio.
O programa incluíu unha mesa redonda con persoas emprendedoras, a entrega de certificados e un espazo de networking entre estudantes, universidades, empresas e institucións.
