O mandatario autonómico trasladou á Federación empresarial de aserraderos e rematantes de madeira de Galicia (Fearmaga) as actuacións levadas a cabo polo seu Executivo. Entre elas, mencionou as axudas para financiar a restauración de infraestruturas dentro da Rede Natura 2000 e o investimento de 13 millóns de euros en catro anos para a conservación de pontes e obras de paso na Rede Autonómica de Carreiras.
Destacou tamén a recente aprobación do Plan director da industria forestal-madeira 2026-2028, dotado con case 114 millóns de euros e 88 medidas. Este plan busca consolidar Galicia como referente nacional e internacional, incorporando intelixencia artificial, sistemas de trazabilidade avanzada, talleres de dixitalización, sostibilidade e loxística, ademais de ecoinnovación e o reforzo da internacionalización das empresas.
“"É importante que o sector e as administracións traballen conxuntamente nos retos actuais, como dar un maior impulso á construción pública con madeira, o apoio á investigación e innovación con novos materiais e a incorporación dos avances tecnolóxicos."
Actualmente, o sector forestal galego representa o 1,7 por cento do PIB da comunidade, con 3.300 empresas e 19.400 afiliados á Seguridade Social. Galicia lidera a produción forestal en España, cunha facturación de case 2.500 millóns de euros, e as exportacións superan os 1.200 millóns.
