O conselleiro de Sanidade, Antonio Gómez Caamaño, destacou hoxe que a sanidade pública galega realiza teleasistencia domiciliaria a 250 pacientes con insuficiencia cardíaca, grazas á plataforma Telea, que está integrada cos sistemas de información corporativos do Servizo Galego de Saúde.
O conselleiro, acompañado polo xerente da área sanitaria da Coruña e Cee, Luis Verde, interveu na XIII Reunión: Estado da arte en Insuficiencia Cardíaca. Práctica clínica e modelos organizativos, organizada pola unidade de insuficiencia cardíaca do Complexo Hospitalario Universitario da Coruña.
A insuficiencia cardíaca non sempre é un episodio puntual, senón unha traxectoria clínica. Por iso, para o conselleiro, é relevante contar con ferramentas como Telea para garantir a continuidade no seguimento lonxitudinal de pacientes con diferentes patoloxías.
Gómez Caamaño tamén incidiu en que Galicia destaca por ser unha das comunidades que máis reduciu a súa mortalidade cardiovascular nos últimos anos, reflexo do traballo clínico, a organización asistencial e a cultura de mellora continua.
O Goberno galego considera a prevención e a anticipación como a súa mellor baza para reducir a insuficiencia cardíaca, incluíndo hábitos de vida saudables e a detección precoz.
No ámbito da cardioloxía, a sanidade pública galega ten protagonizado grandes fitos, como o Programa galego de atención ao infarto agudo de miocardio (Progaliam), pioneiro na coordinación entre atención primaria e hospitalaria.
Tamén se citou o Código Shock Cardioxénico, unha organización multidisciplinaria para ofrecer unha resposta rápida e de alta calidade a pacientes con esta emerxencia médica. Desde a súa posta en marcha a finais do ano 2024, rexistrou máis de 150 casos, a maior parte na área sanitaria da Coruña.
Outras iniciativas de anticipación e diagnóstico precoz son o cribado de cardiopatías conxénitas, que acadou unha cobertura do 99,6 % no seu primeiro ano, con preto de 15.000 neonatos cribados.
A unidade de insuficiencia cardíaca do hospital universitario coruñés, liderada pola doutora María Crespo, foi posta en valor pola súa exemplaridade, sendo acreditada pola Sociedade Española de Cardioloxía e consolidándose como un centro de referencia en España.
O conselleiro rematou insistindo na equidade como unha condición irrenunciable para o bo funcionamento do sistema sanitario.
