Coas eleccións municipais á vista, o Partido Popular comeza a definir as súas estratexias. No caso da Coruña, xurdiron voces que cuestionan a idoneidade de Miguel Lorenzo para liderar a candidatura. Fronte a isto, Alfonso Rueda, durante unha visita á fábrica de Coca-Cola, ratificou a súa confianza no traballo realizado por Lorenzo.

"Na miña opinión, polo traballo, polas expectativas, polo traballo feito ata agora, durante moitos anos na oposición, e tamén polas expectativas futuras -ademais vendo os nerviosos ou nerviosas que se poñen algúns ou algunhas- creo que Miguel Lorenzo está a facer un magnífico traballo", declarou Rueda aos medios.

Non obstante, o líder do PPdeG recalcou a importancia dos procedementos internos: "Unha cousa é que me guste a min, como presidente, e outra cousa é o que se ten que decidir, pero espero sinceramente que coincida coa miña opinión". Engadiu que os candidatos serán anunciados nun mes e que respecta os pronunciamentos finais dos órganos do partido.

A conselleira de Economía e Industria, María Jesús Lorenzana, tamén presente na cidade, desmarcouse da posibilidade de ser candidata, afirmando que desexa seguir no seu posto actual. A decisión final sobre quen encabezará a lista do PP na Coruña recae no presidente da Xunta e o presidente provincial do partido.