As persoas maiores de 16 anos poderán recoller as lentes de observación solar homologadas coa súa entrada aos museos municipais, ata esgotar existencias. Esta iniciativa forma parte da campaña estatal 'Una vista única. Cuídala', promovida polo Ministerio de Ciencia, Innovación e Universidades e o Grupo Social ONCE.
O obxectivo é fomentar a observación segura do fenómeno astronómico, coñecido como 'Trío de Eclipses 2026-2028', e previr os riscos oculares asociados á contemplación directa do Sol. A nivel estatal distribuiranse dous millóns de lentes certificadas, das que 300.000 chegarán a través da Fundación Española para la Ciencia y la Tecnología (FECYT) a museos e entidades científicas, incluídos os Museos Científicos Coruñeses.
O concelleiro de Cultura e Turismo, Gonzalo Castro, destacou a importancia de garantir unha observación segura. "A Coruña será un dos mellores lugares de Europa para observar a eclipse total de Sol do 12 de agosto e queremos que toda a cidadanía poida facelo con todas as garantías", sinalou, engadindo que o Goberno de Inés Rey súmase á campaña estatal.
Ademais das lentes, o Concello xa está a desenvolver accións divulgativas, como a distribución de caixas automontables para a observación indirecta destinadas a familias con menores de 10 anos. Tamén se ofrece información específica sobre métodos seguros de observación e recomendacións prácticas.
O Concello lembra que só se deben usar lentes certificadas conforme á norma ISO 12312-2, sen danos visibles, e insiste en que nunca se debe observar o Sol a través de prismáticos, telescopios ou cámaras sen filtros solares profesionais adecuados. "Queremos que a eclipse sexa unha experiencia extraordinaria para toda a cidadanía, pero tamén unha experiencia segura", concluíu Castro.
Para o 12 de agosto, o Concello preparou un dispositivo especial que inclúe preto de 300 efectivos de seguridade e emerxencias, reforzos no transporte urbano e aparcadoiros disuasorios. A cidade será un dos puntos de referencia para a observación deste evento astronómico, que non se repetirá nestas condicións ata o ano 2180.
