Este venres, a través dun comunicado, Renfe informou sobre as súas intencións de optimizar a oferta de trens de servizo público que operan entre Vigo, Santiago de Compostela e A Coruña. O obxectivo é adaptar estes servizos á demanda actual e ás necesidades da poboación galega.

As melloras artellaranse mediante a asignación de material rodante de maior capacidade, coa incorporación de trens da serie S106, e o reforzo puntual de determinados servizos con composicións dobres, utilizando trens S121. Estas medidas permitirán absorber de forma máis eficiente os incrementos de demanda nos tramos e franxas horarias de maior ocupación.

O denominado «Plan Galicia» tamén contempla a posibilidade de incorporar novos servizos en horas punta, especialmente pola mañá e pola tarde-noite, mellorando a dispoñibilidade para viaxeiros habituais, traballadores e estudantes. Ademais, prevese un aumento do 6% nas prazas diarias dos trens Avant Ourense-Santiago-A Coruña, aproveitando prazas sinerxiadas en trens AVE, Alvia ou Avlo.

O plan atópase actualmente en fase de estudo, coa meta de ser implementado antes de finais de ano. O presidente da operadora ferroviaria mantivo reunións de traballo con responsables de diversas áreas durante a súa visita a Galicia para coñecer de primeira man a evolución deste proxecto.