A proba, que comezou ás 12.00 horas, reuniu a case 400 nadadoras e nadadores de diferentes idades e procedencias para completar un percorrido aproximado de 1.200 metros polas augas da enseada.
Na categoría masculina, Mateo García Castro, de Arteixo, proclamouse vencedor absoluto cun tempo de 14 minutos e 39 segundos. O segundo posto foi para Lucas Costa Fernández, do Club Natación Ponteareas (14:50), mentres que Santiago Avilés Zhuravlev, do Club Natación Liceo, completou o podio (14:55).
Na categoría feminina, a vitoria foi para Alba Castro Cidrás, do CN Galaico, cun tempo de 15 minutos e 35 segundos. Noa Borrazás Rodríguez, do Sporting Club Casino Coruña, acadou a segunda posición (15:53), e Lucía Villarnovo Pazos, do Club Natación Ferrol, foi terceira (15:54).
Tras a competición, o concelleiro de Deportes, Manuel Vázquez, participou na entrega de premios xunto a representantes do Club del Mar de San Amaro.
Esta 85ª edición reafirma o arraigamento dunha competición vinculada á historia deportiva da cidade e á relación da Coruña co mar e a natación.
A historia da travesía está ligada á do Club del Mar de San Amaro, fundado en 1935. Ao longo das décadas, consolidouse como unha entidade deportiva e social histórica da Coruña.
A elevada participación, con 368 persoas rexistradas en 2025, demostra o poder de convocatoria da proba. Daquela, os vencedores foron Lucas Costa Fernández e Noa Borrazás Rodríguez, quen tamén ocuparon postos destacados nesta edición.
O Concello da Coruña mantén a súa colaboración co tecido deportivo local, apoiando entidades como o Club del Mar de San Amaro na promoción da actividade física e a organización de eventos abertos á cidadanía.
